HR. HAMMOND
   Farfisa professional
clockhere
Flettingar í dag: 191
Gestir í dag: 38
Flettingar í gær: 390
Gestir í gær: 56
Samtals flettingar: 6496669
Samtals gestir: 334086
Tölur uppfærðar: 12.12.2018 04:05:51

Færslur: 2009 Október

05.10.2009 18:39

Flytjandi dagsins



Bubbi Morthens 1979-
Ásbjörn Kristinsson (06-06-56) - Söngur, Gítar, Munnharpa 1979-



1. LP Ísbjarnarblús, 17. júní 1980 (Iðunn) / 25 ára afmælisútgáfa, 9. júní 2005 (Íslenskir tónar / Sena)


2. LP Plágan, 27. júlí 1981 (Steinar) / aukalög, 6. júní 2006 (Íslenskir tónar / Sena)


3. LP Fingraför, 22. mars 1983 (Steinar) / aukalög, 6. júní 2006 (Íslenskir tónar / Sena)


4. LP Línudans, 10. nóvember 1983 (Steinar)


5. LP Ný spor, 1. mai 1984 (Safarí Records / Skífan) / aukalög, 6. júní 2006 (Íslenskir tónar / Sena)


6. LP Kona, 6. júní 1985 (Gramm) / 20 ára afmælisútgáfa, 9. júní 2005 (Íslenskir tónar / Sena)


7. LP Blús fyrir Rikka, 28. júní 1986 (Gramm)


8. LP Frelsi til sölu, 13. október 1986 (Mistlur) / aukalög, 6. júní 2006 (Íslenskir tónar / Sena)


9. LP Dögun, 19. nóvember 1987 (Gramm) / aukalög, 6. júní 2007 (Íslenskir tónar / Sena)


10. EP Moon in the gutter, 1. júlí 1988 (Mistlur)


11. EP Bubbi 56, 16. júlí 1988 (Gramm) / aukalög, 6. júní 2006 (Íslenskir tónar / Sena)


12. LP Bláir draumar ásamt Megasi, 10. október 1988 (Gramm)


12. LP Serbian Flower, 19. október 1988 (Mistlur)


13. EP Hver er næstur, 1. júní 1989 (Geisli)


14. LP Nóttin langa, 11. nóvember 1989 (Geisli) / aukalög, 6. júní 2006 (Íslenskir tónar / Sena)


15. LP Sögur af landi, 19. október 1990 (Steinar) / aukalög, 6. júní 2006 (Íslenskir tónar / Sena)


16. LP Ég er, 6. október 1991 (Steinar)


17. LP Von, 31. október 1992 (Steinar)


18. LP Lífið er ljúft, október 1993 (Skífan)


19. LP 3 Heimar, 9. október 1994 (Skífan)


20. LP Í skugga Morthens, 10. október 1995 (Skífan)


21. LP Allar áttir, 12. nóvember 1996 (Skífan)


22. LP Hvíta hliðin á svörtu, 15. nóvember 1996 (Mál & Menning)


23. LP Trúit þú á engla, 16. október 1997 (Skífan)


24. LP Arfur, 15. október 1998 (Skífan)


25. LP Sögur 1980-1990, mai 1999 (Skífan)


26. EP Mér líkar það, mai 1999 (Skífan)


27. LP Bellman, 22. mai 2000 (Skífan)


28. LP Sögur 1990-2000, 23. október 2000 (Skífan)


29. LP Nýbúinn, 8. nóvember 2001 (Skífan)


30. LP Sól að morgni, 7. október 2002 (Skífan)


31. LP 1000 kossa nótt, október 2003 (Skífan)


32. EP Nei nei nei - Tjáningarfrelsi (ltd), 14. júní 2004 (Skífan)


33. LP Tvíburinn, október 2004 (Skífan)


35. LP Ást, 15. desember 2005 (Sena)


36. LP Í 6 skrefa fjarlægð frá Paradís, 15. desember 2005 (Sena)


37. LP Gleðileg jól 2005 (Takmarkað upplag í DVD hulstri) (Tolli - Bónus)


38. LP Bláir, 6. júní 2006 (Íslenskir Tónar / Sena)


39. LP Lögin mín, 6. júní 2006 (Sena)


40. LP 06.06.06, 16. október 2006 (Sena)


41. LP Góð verk 07. febrúar 2007 (Sérstök safnplata fyrir iPod) (Apple á Íslandi) (Sena / Apple)


42. Ísbjarnarblús (Stafræn útfáfa fyrir netsölu) 3. janúar 2008 (Net Sena)


43. LP Fjórir naglar 6. júní 2008 (Sena)


44. LP/DVD Bubbi og Stórsveit Reykjavíkur, 4. nóvember 2008 (Skífan)

Bubbi Morthens, Ég kalla nú tónlist mína gúanórokk. Ég var meira í accoustic tónlist áður, hlustaði mikið á blús og safnaði gömlum blúsplötum, en þegar ég heyrði fyrst í Iggy Popp. Þá ákvað ég að söðla um og gerast nýbylgjurokkari. Og platan mín, sem átti fyrst að vera órafmögnuð blúsplata, hefur breyst mikið í vinnslu, en textarnir eru þeir sömu og áður. Þessvegna kalla ég þetta gúanórokk.Hér mælir Bubbi (Ásbjörn) Morthens. Einn af þessum sérstæðu neðan jarðar söngvurum sem nú er að hljóðritað sína fyrstu breiðskífu.
(brot úr viðtali við Bubbi Morthens í HP 22.febrúar 1980)

Ef platan selst ekki, slæ ég bara vaxtaaukalán og fer á sjóinn það verður ekki aftur snúið.
(úr viðtali við Bubbi Morthens í Þjóðviljanum  11.maí 1980)

Þegar Bubbi tók þá afdrífaríku ákvörðun í árslok 1979 að hljóðrita trúbadúrplötuna "Hver Þungt Er Yfir Bænum" sem síðar breyttist og var Ísbjarnarblús (1980). Velti hann meiru af stað en nokkurn gat órað fyrir. Í tónfræðilegum skilningi var ekkert nýtt undir sólinni á Ísbjarnarblús en frá textalegum sjónarhóli var platan bylting. Þar sýndi Bubbi ekki aðeins fram á að hægt var að semja Íslenska texta um Íslenskan raunveruleika á trúverðugan hátt, heldur fór hann alla leið í áliti sínu á þessum raunveruleika. Reiði hins unga rokkara og fyrirlitningin á því óréttlæti sem hann taldi alþýðu landsins beitta, þó sér í lagi farand.- og fiskverkafólk kom bersýnilega í ljós. Stuðlum og höfuðstöfum var aftur á móti gefið langt nef, ekki af ásetningi né að svo yrði að vera, heldur voru þau fræði Bubba ekki kunn sem slík.
Enda hafa menn efast um það eftir á að platan hefði orðið eins sterk hefði Bubbi bundið sig við reglur bragfræðinnar á þessum tímapunkti.

Með öðrum orðum Bubbi flutti lög sín og texta eins og þau lágu fyrir honum. Eins og hann orðaði það sjálfur: Innihaldið var rammanum merkilegra. Megin innihald plötunnar var það líf sem hann þekkti og því lýst eins og hann upplifði það. Harka flækingsins sem stöðugt verður að aðlaga sig nýjum siðum á hverjum stað án þess að tapa persónuleika sínum og sjálfstæði var undirtónn plötunnar.

Með stofnun Utangarðsmanna var Bubbi gerður af persónugervingi rokkbyltingarinnar á Íslandi. Að vísu var ekki spurning um slíka byltingu, heldur hvenær og hvernig?. Bubbi hafði allt að bera til að standa undir því, þó að litlu munaði að fyrir honum færi eins og svo mörgum öðrum sem settir hafa verið á slíkan stall. En Bubbi stóðst álagið. En hvers vegna var hann valinn af fjölmiðlum og öðrum sem slíkur?

Ástæður þess kunna að vera margar, en strax á sinni fyrstu plötu sýndi Bubbi hversu sterkar myndir hann getur málað með orðum og hversu næmur hann er á þá liti. Bubbi söng ekki lengi um líf farandverkamannsins. Heldur fylgdi þeirri stefnu sem hann hafði markað sér sérstöðu með: að umfjöllunarefnið sé hans heimur og veröldin eins og hún blasir við honum á hverjum tíma fyrir sig.

Þetta hefur gert það að verkum öðru fremur að hann hefur verið sjálfum sér trúr í listsköpun sinni og sér í lagi ljóðagerðinni. Með hljómsveitinni Egó og sólóplötunni Fingraför (1983) náði Bubbi auknum vinsældum almennings og seldust plötur hans og sveitarinnar í stærra upplagi en hann hafði áður þekkt. Á árunum 1984 til 85 lifði Bubbi sígandi lukku lífs síns og orðspor listamannsins fylgdi á þeirri niðurleið.

En Bubba hefur oft ratast satt orð í munn í textum sínum. Næmni hans er hluti af listinni. Skyldi hann sjálfur hafa verið búinn að gera sér nokkra grein fyrir því hvað beið hans um áramótin ´84-´85 er hann samdi "Snertu mig" sem út kom á plötu Das Kapital - Lili Marlene (1984). Texta lagsins má allt eins túlka sem kveðjuóð til þeirra efna sem hann hafði keyrt á undanfarin ár.

Snertu mig, snertu mig, einu sinni enn
Snertu mig aftur ég er á förum senn
Munnur minn þurr, augun blind
Mig vantar skjól fyrir þreytta synd
Safna kjarki nýjum þrótt
Örlög mín fara fyrir rétt í nótt

Eins og fram kemur í textanum safnaði hann nýjum þrótt og kom fram, textalega séð sterkari en nokkru sinni fyrr með plötuna Kona (1985) Frá þeirri stund hefur leið listamannsins Bubba legið uppá við. Ekki í stjörnuleit heldur í leit að nýjum leiðum og formum þeirrar listgreinar sem hann hafði valið sér og hann hefur þorað að fylgja þeim eftir í sköpun sinni. 

Samningur hans við Sænska útgefenda Mislur gaf honum tækifæri á að gera rokkplötu eins og þær gerast bestar. Það er vægt til orða tekið að segja að platan Frelsi Til Sölu (1987) hafi slegið í gegn, hún varð algert HIT. Vinsældir Bubba og hljómsveitarinnar MX-21 sem hann stofnaði til að fylgja plötunni eftir voru einsdæmi í Íslenskri rokksögu. Þessi plata markaði líka tímamót í sögu plötuútgáfu á Íslandi.

Hún varð fyrst platna til að koma út á CD. Þó aðrir hefðu gert slýkar plötur voru þær fyrst og fremst hugsaðar fyrir erlendan markað. Þrátt fyrir að markaðslögmálið byði honum nú að gera plötu í líkum stíl og Frelsið, valdi Bubbi að kúvenda. Rokkið vék fyrir ballöðunum og Dögun (1988) varð einhver fágaðasta plata sem frá honum hafði komið á ferlinum. Og seldist í enn stærra upplagi en nokkur platna hans til þessa.

Bubbi hafði ekki aðeins brotið upp Íslenskt tónlistarlíf með Ísbjarnablús og stofnun Utangarðsmanna árið 1980 Hann sannaði líka 1988 að í Íslenskri plötuútgáfu er ekki til neitt sem heitir markaðslögmál. Bubbi hefur verið leitandi listamaður frá upphafi ferilsins, Aldrei gengið að neinu vísu. Stöðugt leitast við að bæta sig, hvort heldur er textagerðina, útsetningar eða melódíuna sjálfa. Um þessa leit Bubba vitna textar hans og ljóð eins og á Sögur Af Landi (1990) sem verður að telja eina af stærri verkum hans síðari ár með lögum eins og "Sonnetta" - "Fjólublátt flauel" - "Að eilífu ung" - "Síðasti örninn" og "Stúlkan sem starir á hafið" að ógleymdum textanum og laginu "Sú sem aldrei sefur"

Öll lög þessarar plötu eru feikilega myndsterk og eins og svo oft í ljóðum Bubba eru þar að finna magnaðar myndlíkingar. Hverjum hefur ekki einhverríman á erfiðleikatíma lífs síns liðið eins og trjánum í "Vals fyrir Brynju"

Hálfnakin trén tapað hafa áttum
Trúlega eiga þau bágt
Í vindinum skilja að skjólið verði lítið
Þegar skellur á norðanátt.

 Bubbi hafði árið 1990 starfað sem tónlistarmaður í heilan áratug og lengst af þann tíma verið vinsælasti tónlistarmaður landsins en um leið sá umdeildasti. Þessi staðreynd gaf honum tækifæri á að láta gamla drauma rætast. Einn þeirra var að gera plötu undir spænskum og eða suður-amerískum áhrifum og það gerðist með plötunni Von (1992). Til að hljóðrita þá plötu var haldið til Kúbu þar sem grunnar hennar voru hljóðritaðir með þarlendri sveit; Sierra Mastera.

Sér til halds og trausts fékk hann Eyþór Gunnarssonar sem útsetjara en samvinna þeirra félaga hefur enst út allan þennan áratug. Tónlistarlega var Von ólík því sem Bubbi hafði áður sent frá sér. Þó hann hefði áður gælt við þessa tónlistarstefnur hafði hann ekki stigið skrefið til fulls fyrr. Þrátt fyrir fjörleika laga og útsetninga eru ljóðin undarleg blanda, annars vegar tregafullra saknaðar og minningaljóða og svo ádeiluljóðanna sem Bubbi var þekktur fyrir.

Þessi leikur hans að andstæðunum, það er léttleika tónlistarinnar og svo innihaldsríkum ljóðum, heppnast fyllilega. Bubbi beygir sig þó ekki fyrir forminu heldur nær að sveigja það að sér og ljóðagerð sinni. Enn á ný stækkaði hann hlustendahóp sinn, enn á ný kom hann hlustendum sínum á óvart.

Þegar Bubbi gerðist svo ósvífinn að sumra mati að gera heila plötu um ástina töldu margir að nú hefði honum fatast flugið. Þessi harði rokkari væri nú heillum horfinn. Það tók hlustendur mislangan tíma að uppgötva að þeir höfðu í höndunum einhverja þá persónulegustu plötu sem út hafði komið hér á landi. Andstæða óhamingjunnar er hamingjan og það var Bubbi einmitt að opinbera, eigin hamingju yfir að vera ástfanginn heimilisfaðir. Öllu persónulegra gerist það ekki.

En platan gerir meira en að lýsa ástum Bubba til fjölskyldu sinnar, því þar er og að finna lagið ,"Horft til baka" sem túlkað hefur verið sem svanasöngur hans til plötunnar Kona (1985). Þessa kenningu má rekja til merkingar textans sem var hljóðritaður undir heitinu "Skilnaður", sem þykir undirstrika að Bubbi kveðji ákveðin tímabil ferilsins með sátt í huga.

Þessi augu minna á herskip hjartans
sem hljóðlaus sigla vokandi dimmrautt hafið.
Tundurskeytaorðin finna í myrkrinu markið
og móðurskip heilans liggur í djúpinu grafið.

Segja má að næsta plata Bubba, 3 heimar (1994) sé upphaf á einskonar smásagnasafni sem nær til þriggja platna, það er 3 heimar, Allar áttir (1996) og Trúir þú á engla (1997), en sú síðastnefnda var unnin undir heitinu Syndir feðranna á vormánuðum 1997. Á þessum þrem plötum, sem meðal aðdáenda hafa verið nefndar samfélagstrílógía Bubba, eru lögin eins og sjálfstæðar sögur. Titlarnir þrír lýsa innihaldinu vel þar sem umfjöllunarefnið er oftar en ekki það samfélag sem við lifum í, en um leið þættir þess sem fæstir vilja nokkuð vita um. Ólíkt því sem Bubbi gerði í upphafi ferilsins, er hann gaf yfirlýsingar, lét skoðanir sínar afdráttarlaust í ljós eða hjó mann og annan, spyr hann nú áleitinna spurninga og lætur hlustandanum eftir að svara.

Inn á milli þessara þriggja platna sendi Bubbi frá sér tvö verk sem líta má á sem einskonar hliðarverk. Það fyrra, Í skugga Morthens (1995) sem þó er sólóplata í þröngum skilningi þess orðs, hefur verið túlkað sem einskonar virðingarplata tileinkuð Hauki Morthens, föðurbróður Bubba. Á þeirri plötu flytur Bubbi áður þekkt verk er Haukur hafði hljóðritað. Bubbi nálgast þessi lög með þeirri virðingu sem þau eiga skilið. Síðara verkið var stórmerkileg ljóðaplata, Hvíta hliðin á svörtu, sem sumir sjá sem ævisögu Bubba í stuttri útgáfu.

Með plötunni Arfur (1998) sýndi Bubbi okkur þann fjársjóð sem finna má í menningararfi okkar Íslendinga, hann sýnir þar og sannar að í þann brunn má alltaf sækja og að vikivakar og þulur eru fyllilega nothæf í dægurtónlist nútímans. Bubbi lét ekki þar við sitja heldur leitaði aftur til liðinna tíma í tónlistinni er hann sendi frá sér plötuna Bellman (2000) sem hann vann í samstarfi við Guðmund Pétursson. Fullyrða má að þar hafi Bubbi bætt enn einu blómi í hnappagat íslenskrar dægurtónlistar. Sú plata mun fyrr en síðar verða talin ein af meistaraverkum í íslenskri plötuútgáfu á þessum áratug.   

Þegar litið er yfir tónlist Bubba 1990-2000 sést glögglega fjölbreytnin í henni, allt frá ástarljóðum til rokklaga G.C.D., frá vikivökum og þulum til óbundinna ljóða, frá gömlum perlum Hauks Morthens til drykkjusöngva Bellmans, frá einfaldleika trúbadúrsins til suður-amerískra takta. Sá tónlistarauður sem liggur eftir Bubba Morthens mun seint metinn til fjár, en sú staðreynd stendur að þessi auður mun með áhrifum sínum auðga íslenska dægurtónlist um alla framtíð.

Meðan unnið var að gerð safnplötunnar Sögur 1990-2000 varð til hljómsveitin Stríð og Friður en sú sveit átti eftir að fylgja Bubba í hljóðverið á næstu árum. Meðal fyrstu verka sveitarinniar í hljóðverinu var að taka upp nokkur lög fyrir safnplötuna. Tvö þeirra voru sett inn Lagið "Pollyanna" og "Sjö daga víma. Einnig hljóðritaði sveitin lagið "Vögguvísa" en ákveðið var að það færi ekki inn á þessa plötu. En það lag átti Bubbi eftir að hljóðrita á nýjan leik

Árið 2001 var Bubbi í rokkgír með Stríð og Frið og sendu frá sér plötuna Nýbúinn. Platan sem var þó skrifuð á Bubba sem sólóplata náði að vekja talsvert umtal. Sérstaklega var það titillag plötunnar, en með því vildi Bubbi vekja fólk til umhugsunar á þeim rasistma sem virtist vera að skjóta upp rótum hér á landi, margir töldu textan geta orðið vatn á myllu þeirra. Myndband við lagið varð einnig gert að sæta skoðun yfirvalda tilað athuga hvort lög um íslenska þjóðfánan hefðu verið brotin, eftir nánari athugun var niðurstaðan sú að svo væri ekki og málið látið þar við sitja. Efni plötunnar kom aðdáendum á óvart sem töldu kveða við nýja takta í textagerðinni. Platan náði ekki sömu sölutölum og útgefendur hans voru vanir að sjá. Plötunni var engu að síður fylgt eftir samkvæmt venju og Stríð og Friður efni til tónleika með nokkuð reglulegu millibili.

Rokkið var sett til hliðar, Stríð og friður var horfin sem slík en meðlimir sveitarinnar voru Bubba innan handar við gerð næstu plötu, sem unnin var undir heitinu Guð er kona snemma árs 2002. Nafn plötunnar varð Sól að morgni þegar hún kom út og virtist koma flestum á óvart að platan náði metsölu og í árslok stóð hún uppi sem ein söluhæsta plata ársisn. Lög eins og "Við Gróttu", "Skjól hjá mér þú átt" og "Guð er kona" náðu eyrum almennings. Á Sól að morgni fetar Bubbi enn og aftur inn á nýjar slóðir tónlistarinnar með lokalaginu Kveðja sem er í raun sálmalag. Bubbi hafði reyndar samið lagið og textagrunn nokkrum misserum áður, þá sem barnagælu til sonar síns.

Þessi jákvæðu viðbrögð plötukaupenda leyfðu Bubba að halda sig á slýkum slóðum á næstu plötu 1000 kossa nótt. En með henni segist hann vera að loka ákveðnu ferli sem hafi hafist með plötunni Lífið er ljúft (1993), og hafi haldið áfram á Sól að morgni. En djúptsokknir aðdáendu sáu þó ekki þessa samlíkingu. Öllu frekar að platan væri eðlilegt framhald og þróun frá Sólar að morgni. Meðal lag á 1000 kossa nótt er ný hljóðritun af "Vögguvísu" sem fékk heitið "Fagur fiskur í sjó (vögguvísa)".

Ári síðar sendi Bubbi frá plötuna Tvíburinn (2004) og enn kom hann á óvart í tónlistarsköpun sinni og nú með bluegrass-tónlist sem er einskonar forveri kántrý-tónlistarinnar eins og við þekkjum hana í dag. Á plötunni bar mest á kassagítarnum og banjóinu. Yrkisefnið er sótt annarsvegar í íslenskan raunveruleika sjómannsins og hinsvegar sótti hann áhrif í Tómasarguðspjallið við textagerðina. Þeir textar gætu þó allt eins átt heima í nútímanum þegar grannt er skoðað.

Sumarið 2005 komu út hvorki meira né minna 2 nýjar plötur frá Bubba. Upptökur á plötunum hófust vorið 2004 þegar Bubbi fékk Barða Jóhannsson í lið með sér til að hljóðrita lagið Fallegur dagur. Lagið sló í gegn og þá þegar var ákveðið að Barði myndi stýra upptökum á heilli plötu með Bubba og hafist var handa við það þegar líða tók á árið en með hléum þó. Þegar komið var að því að einbeita sér að upptökum í byrjun árs 2005 kom á daginn að frábær lög hrönnuðust upp hjá Bubba hvert á eftir öðru og menn sáu fram á mikinn vanda við að skera niður. Eftir miklar vangaveltur var niðurstaðan sú að hafa plöturnar tvær og ákveðið að fullvinna þær í Frakklandi. Það var og gert og síðustu 2 vikurnar voru teknar með miklu áhlaupi þar syðra þar sem stór hluti hljóðfæraleiks og söngs var tekinn upp auk þess sem plöturnar voru hljóðblandaðar.
Plöturnar skiptust gróflega upp í poppaða plötu "Ást" og rólegri plötu "...Í 6 skrefa fjarlægð frá Paradís" en voru unnar sem eitt verk og sama fólk kemur að vinnslu á báðum plötunum. Þar skal helst nefna að Barði stýrði upptökunum og spilaði á fjölmörg hljóðfæri, Guðmundur Pétursson lék á gítar í nokkrum lögum og Jakob Smári á bassa í nokkrum lögum en franska ryþmaparið Denis Benarrosh og Laurent Vernerey sáu að mestu um grunninn. Hvor plata um sig telur 11 ný lög en plöturnar teljast hiklaust með allra bestu verkum Bubba. Í lok árs 2005 komu plöturnar út aftur saman í pakka ásamt DVD diski sem geymdi heimildarmyndina Ást í 6 skrefa fjarlægð frá Paradís en í henni er fylgst með gerð platnanna í Frakklandi. Bjarni Gríms leikstýrði myndinni. Ást og Í 6 skrefa fjarlægð frá Paradís voru báðar tilnefndar til Íslensku Tónlistarverðlaunanna sem Hljómplötur ársins og unnu þann flokk auk þess sem lagið Ástin mín fékk tilnefningu sem Lag ársins. Bubbi var tilnefndur í flokknum Söngvari ársins, sem hann vann.

Þriðjudaginn 18. október 2005 gaf Sena út Ísbjarnarblús og Konu í viðhafnarútgáfum. Um var að ræða 25 ára afmælisútgáfu af fyrstu plötu Bubba, Ísbjarnarblús. Þar var m.a. að finna 9 upptökur sem ekki voru á plötunni í upphafi. Er þar um að ræða 5 lög tekin á tónleikum fyrir útgáfu plötunnar en 2 þeirra eru lög sem Bubbi hafði aldrei gefið út á plötu og meðal annarra tónleikalaga má nefna frumflutning hins ástkæra lags Stál og hnífur en sú upptaka er frá tónleikum á vegum Vísnavina í Norræna húsinu haustið 1979. Hin 4 aukalögin á 25 ára Ísbjarnarblús eru ónotaðar tökur frá hljóðritun plötunnar, svokölluð Outtakes. Á Konu tvítugri var að finna 7 viðbótarlög. Tvö þeirra voru prufuupptökur laga sem höfðu aldrei áður komið út hjá Bubba en fjögur hinna voru tekin á afmælistónleikum Bubba árið 1986. Eina ónotaða hljóðverstöku var svo að finna á plötunni en það er lagið Seinasta augnablikið sem geymir í þessari töku áður óheyrt erindi sem ekki var á endanlegu plötunni.

Þann 6. júní 2006 varð Bubbi Morthens fimmtugur og fagnaði áfanganum með stórtónleikum í Laugardalshöll. Ásamt Bubba komu fram allar þær hljómsveitir sem hann hefur stofnað og gefið hafa út efni. Þetta voru EGÓ, GCD, MX-21, UTANGARÐSMENN, DAS KAPITAL og STRÍÐ OG FRIÐUR. Það er skemmtilegt frá því að segja að hljómsveitirnar voru í allar í sinni upprunalegu mynd eða þeirri mynd sem lengst starfaði saman. Mikil stemmning myndaðist í kringum tónleikana og varð uppselt á mettíma. Tónleikarnir voru sendir beint út til þjóðarinnar og ekkert var til sparað við uppsetningu á sviði, myndvörpum og tækniubúnaði. Er það mál manna, og á engan hallað , að aldrei hafi verið settir upp jafn glæsilegir tónleikar. Tónleikarnir komu síðan út á DVD og geislaplötu fyrir jólin 2006 undir nafninu 06.06.06. DVD diskurinn fór gríðarlega vel af stað og í fyrstu vikunni seldist hann í næstum 1.000 eintökum. Það var einstakur viðburður í sölu á DVD og slagar upp í um helming þess sem einstakur tónlistarmynddiskur hafði selst í á Íslandi. Bubbi sannaði því enn einu sinni að hann er áhrifamesti tónlistarmaður þjóðarinnar. Geislaplatan fór einnig beint í fyrsta sæti á Tónlistanum strax í fyrstu viku.

Í tilefni afmælisdagsins gaf Sena út níu af fyrstu sólóplötum Bubba í veglegum afmælisbúningi undir merki Íslenskra tóna. Þetta voru plötunar Plágan (1981 - Upprunalega platan + 6 aukalög), Fingraför (1983 - Upprunalega platan + 5 aukalög), Ný spor (1984 - Upprunalega platan + 9 aukalög), Frelsi til sölu (1986 - Upprunalega platan + 9 aukalög), Dögun (1987 - Upprunalega platan + 6 aukalög), 56 (1988 - Upprunalega platan + 9 aukalög), Bláir (1988 - Upprunalega platan + 5 aukalög), Nóttin langa (1989 - Upprunalega platan + 5 aukalög) og Sögur af landi (1990 - Upprunalega platan + 6 aukalög). Vert er að geta þess sérstaklega að stuttskífan 56 hafði ekki verið fáanleg á geislaplötu í meira en áratug og einnig að platan sem nú er nefnd Bláir er hlutur Bubba af sameiginlegu verki hans og Megasar sem kom út undir nafninu Bláir draumar á sínum tíma. Hún hafði einnig verið ófáanleg um mjög langt skeið en árið 2002 sendi Megas frá sér sinn hluta verksins undir nafninu Englaryk í tímaglasi. Með þessari glæsilegu útgáfu má segja að allt útgefið efni Bubba sem sólóflytjanda frá árunum 1980 til 1990 sé hægt að finna á þessum endurútgáfum en í raun geyma þær mikla meira en það.

Þrátt fyrir að ekki kæmi út ný plata frá Bubba næstu misseri var hann langt frá því að sitja auðum höndum. Stórtónleikar voru áberandi hvort heldur var með Stórsveit Reykjavíkur í Laugardalshöll, Stríð og frið á Nasa, dúett með Forsætisráðherra Íslands, Geir H. Harde, á tónleikum gegn rasisma í Auturbæ eða endurstofnun Egósins með Begga Morthens á gítar. Bubbi lagði nafn sitt við sérútgáfu iPods og nýtti það til styrktar unglingarstarfi SÁÁ, rétti ungum tónlistarmönnum hjálparhönd eins og Poetrix, stjórnaði umdeildum sjónvarpsþætti Bandið hans Bubba svo eitthvað sé nefnt. Það var svo í ársbyrjun 2008 sem Bubbi hóf að undirbúa fyrir alvöru nýja plötu og fékk til liðs við sig Pétur Ben í hlutverki upptökustjóra og útsetjara, en Stríð og friður var Bubba innan handar við spilamennskuna sem fyrr. Fjórir naglar var heiti plötunnar sem sem kom út í júní 2008 og var vel tekið af gagnrýnendum og almenningi. Bubbi sagði að fyrir sér hefði titill plötunnar ákveðna merkingu sem hann vildi þó ekki láta uppi hver væri en menn gætu tekið honum eins og þeim sýndist. Trúartilvitnunin var þó augljós og strax voru aðdáendur hans þess fullvissir að nokkur lög þessarar plötu kæmu til með að setjast á bekk klassískra Bubbalaga.


Bubba var ekki til setunnar boðið. Fyrirhugaðir tónleikar með Stórsveit Reykjavíkur voru framundan 4. og 5. janúar 2008 og því er æft þennan dag. Ljósmyndarar blaða og tímarita mæta á svæðið og mynda Bubba við æfingar. Þá birti Fréttablaðið fyrirhugaðan lagalista kvöldsins. Pakkinn var flottur með lögum eins og Lög og regla, Aldrei fór ég suður, Þorskacharleston, Sumar konur, Rómeó og Júlía, Kossar án vara, Eina nótt í viðbót, Frosin gríma, Þingmannagæla svo dæmi séu tekin. Já framundan var auðsjáanlega eyrna- og augnakonfekt.

Gríðarlega góð stemning var á nýárstónleikum Bubba Morthens og Stórsveitar Reykjavíkur sem fóru fram í Laugadalshöll 4. janúar 2008. Bubbi lýsti því yfir að á sínum 27 ára tónlistarferli hefði hann aldrei staðið á sviði með jafn góðri hljómsveit og Stórsveit Reykjavíkur. Gestir Bubba á tónleikunum voru þeir Ragnar Bjarnason og Garðar Thór Cortes og eins og sjá má ná þeir félagar vel saman á sviðinu þar sem þeir fluttu saman lagið Sumarið er tíminn. Þetta voru fyrri tónleikarnir af tveimur með Bubba og Stórsveitinni en þeir seinni fóru fram kvöldið eftir.

Reyndar mátti lesa á forsíðu Fréttablaðsins næsta morgun leiðindarfrétt frá tónleikunum þar sem manni í annarlegu ástandi hafði verið vísað frá tónleikunum. Í bræði sinni hafi viðkomandi sparkað í gegnum rúðu og síðan rokið á brott, eftir að hafa ógnað starfsmönnum með hníf. Lögregla var þá kölluð til sem hafði upp á manninum skömmu síðar og naut aðstoðar sérsveitarinnar við að handtaka hann og færa á lögreglustöðina þar sem málið fékk sína meðferð.

Leikurinn frá 4. janúar var endurtekinn daginn eftir. Löngu uppselt á þessa tónleika, enda aðaltónleikarnir. Það var mál þeirra sem fóru á báða tónleikana að lítill munur hafi verið á þeim. Stórsveitin frábær, útsetningar flottar og stjarna kvöldsins skilaði sínu eins og hans er von og vísa.

Tónleikarnir voru teknir upp bæði fyrir CD og DVD og komu svo út 4. nóvember 2008

Bárður Örn Bárðarson / tonlist.is
  • 1