HR. HAMMOND
   Farfisa professional
clockhere
Flettingar í dag: 397
Gestir í dag: 45
Flettingar í gær: 390
Gestir í gær: 56
Samtals flettingar: 6496875
Samtals gestir: 334093
Tölur uppfærðar: 12.12.2018 14:23:03

Færslur: 2009 September

17.09.2009 18:55

Flytjandi dagsins

Bjartsýnismenn 1989-1991
Sigurður Snorri Jónsson - Söngur, Bakraddir 1989-1991 (15-07-73)
Helgi Jóhann Hilmarsson - Gítar, Bakrödd 1989-1991 (13-06-71)
Guðmundur Heiðar Gunnarsson - Hljómborð 1989-1991 (01-06-71)
Óli Pétur Jakobsson - Bassi, Söngur, Bakraddir 1989-1991 (14-07-71)
Einar Ársæll Hrafnsson - Trommur, Bakrödd 1989-1991 (15-05-71)


Óli-Gummi-Siggi-Helgi-Einar


1. LP Húsið, 1991 - þar á hljómsveitin eitt lag "Söknuð" sem er 7. lag safnplötunnar (Stöðin hf.)

Við fórum og gerðum garðinn frægan í Höfuðborginni Reykjavík og tókum upp eitt lag í hljóðveri Axels Einarssonar Stöðinni þar sem við nutum aðstoðar nokkurra manna. Pálmi Sigurhjartarsson ákvað að slá á létta strengi og leika á slaghörpu og Axel sjálfur ákvað að rífa upp raddbönd sín ásamt fyrrverandi barnastörnunni Ruth Reginalds og negla nokkrar bakraddir, einnig var mjög ungur drengur og ófrægur fenginn til að blása í blásturshljóðfæri, Óskar Guðjónsson (frændi Óla Péturs) og blés hann af stakri snilld í saxafóninn sinn og tókst allveg glimrandi. (Hann er nú miklu miklu frægari tónlistamaður í dag en við hinir og hefur spilað með þeim flestum og til að mynda Mezzoforte og Jagúar.) Svona var bandið skipað: Guðmundur Heiðar Gunnarsson hljómborð, Einar Ársæll Hrafnsson trommur, Óli Pétur Jakobsson bassi, Sigurður Snorri Jónsson söngur og Helgi Jóhann Hilmarsson gítar. Lagið sem tekið var upp á einni dagstund í mars 1989 heitir "Söknuður" lag: Guðmundur Heiðar Gunnarsson Texti: Bjartsýnismenn. Kom svo út á plötunni "Húsið" 1991 safnplata til styrktar Krísuvíkursamtakanna.
Heimildir: minni Guðmundar Heiðars Gunnarssonar.

Ef þið hafið upplýsingar, sendið á:
hammond@simnet.is

Uppfært 30-08-09

15.09.2009 17:04

Flytjandi dagsins

Brain Police (fyrsta giggið 12. nóvember 1998) 1998-
Jónbjörn Ríkharðsson "Tucker" - Trommur 1998-
Hörður Stefánsson - Bassi 1998-
Vagn Leví (Viggó) Sigurðsson - Söngur, gítar 1998-2000
Gunnlaugur Lárusson - Gítar 1998-janúar 2005 / 2007-
Jens Ólafsson - Söngur 2002-
Búi Bentsen - Gítar og hljóð 2005-2007 (10-03-79)

  
       Jenni-Höddi-Jónbi-Búi                                Jenni-Höddi-Jónbi-Gulli


 1. LP Glacier sun, 2000 (Geimsteinn)


 2. EP Master brain, 2002


 3. LP Brain Police, október 2003 (Dennis Records)


 4. LP Electric fungus, október 2004 (Dennis Records)

 
 5. LP Beyond The Wasteland, 2006 (Dennis Records)

 
 6. EP Rooster booster, 2006 (Dennis Records)

BRAIN POLICE vöktu fyrst athygli fyrir örfáum árum þegar Bisund, Mínus og Vígspá voru að byrja að skapa í kringum sig stemningu á tónleikum og tilfinningu um að eitthvað nýtt væri að gerast í neðanjarðarokkinu.

Það sem mér dettur í hug er kannski það að Ísland er soddan tískuland , allir þurfa að vera að gera eins og hinir og ætli Black Sabbath hafi nokkurn tíma verið í tísku á Íslandi sem ég skil ekki.


Annars þá vorum við ekki að pæla neitt sérstaklega í Sabbath einni og sér þegar við byrjuðum, heldur var bara almennt þetta 70´s sánd sem var að heilla okkur, Deep Purple, Led Zeppelin, Atomic Rooster, Iron Butterfly og að sjálfsögðu snillingarnir í Kiss.


En ástæðan fyrir því afhverju við sándum eins og við sándum er sennilega vegna þess að við erum allir að fíla hljómsveitir á borð við Kiss og Fu Manchu sem voru okkar helstu áhrifavaldar er við vorum að slíta barnskónum í rokkinu.


Það er alltaf gaman að rokka, hvar og hvenær skiftir ekki máli en það hefur oft verið nokkuð skondið: Það var til dæmis þegar við vorum að spila í undirheimum FB á einhverju hardcore festivali, á undan okkur höfðu spilað nokkrar efnilegar harðkjarnasveitir og fólkið í salnum í gríðarlegum fíling ,slamm og læti það var eins og allir ætluðu upp úr kjallaranum í gegnum loftið (þú veist hvað ég á við; Mosh from hell) sem sagt stemmningin var nokkuð góð.


Síðan steig Brain á sviðið og viti menn, ekkert gerðist, fólkið stóð bara og starði, kannski vegna þess hvað við vorum góðir, en sennilega því engin vissi hvernig þeir áttu að hreyfa sig - ekkert hardcore, bara groove og engin skildi neitt. Annars held ég að Brain Police sé hljómsveit sem fittar inn nánast hvar sem er.


Nýi söngvarinn?


:Alveg frá upphafi höfum við verið í vandræðum með söngvara, Vagn leví átti aldrei að vera söngvari heldur bara gítarleikari, en þar sem við fengum engan söngvara í byrjun þá var hann látinn syngja því hann var sá eini af okkur sem gat sungið.


Síðan skildu okkar leiðir og upp hófst mikil leit að söngvara. Fljótlega eftir að Viggó fór þá kom drengur inn í myndina sem heitir Hjalti. Þarna var kominn maður sem við vorum nokkuð sáttir við og ég held að við hefðum getað gert góða hluti með honum ,enn eins snögglega og hann kom inn í bandið þá var hann farinn.


Eftir þetta held ég að við höfum fengið um 13 söngvara á æfingu, en fæstir þorðu ekki einu sinni að prófa, horfðu bara, slefuðu og létu sig síðan hverfa.


Allt þetta söngvara vesen færði mikla togstreitu inn í bandið og í ágúst á síðasta ári sauð uppúr og bandið lagðist í dvala.


Ég held að þetta sé það besta sem komið hefur fyrir bandið því í þessum dvala þá fann ég ungan mann sem flestir þekkja sem Jenna.

Það var nú þannig að ég var staddur á Akureyri í heimsókn hjá mjög góðum vini mínum. Alltaf þegar við hittumst þá tökum við vinyl kvöld (þá eru geisladiskar bannaðir, bara vínyll). Þetta kvöld var svolítið sérstakt því í fyrsta skifti í sögu þessara alræmdu vínylkvölda þá fengu tveir gestir að fljóta með og Jenni var annar þeirra.

Bandið hans Toy Machine var þá hætt störfum og hann orðin þyrstur í rokk, við fórum að spjalla og við ákveðum að gera eitthvað. Á þessum tíma vorum við byrjaðir að tala um að fara að spila aftur og strax eftir áramótin fengum við Jenna suður á æfingu og ég get ekki líst því hvernig það var. Hrein og klár snilld! Þetta small alveg frá fyrstu tónum. Fyrsta lagið sem við spiluðum saman var ofurslagarinn "One blow to many " og Jenni þurfti bara að heyra það einu sinni og svo söng hann það og við gátum ekki annað en hlegið. Þarna var kominn söngvarinn sem við höfðum verið að leita af frá degi 1.


Síðar flutti Jenni suður og Rokkið verður bara meira og meira.

Gunnlaugur Lárusson yfirgaf svo sveitina í janúar 2005 vegna ágreinings og Búi Bentsen var fenginn í hans stað. Aftur urðu svo sætaskipti þegar Gunnlaugur eða Gulli kom aftur í bandið 2007 og Búi Bentsen hvarf á braut.

Stay Rock!

Tekið af hardkjarni.com / Seinustu klausuna skrifaði ég.

Ef þið hafið upplýsingar, sendið á:
hammond@simnet.is

Uppfært 29-08-09

12.09.2009 18:05

Flytjandi dagsins

Bítlavinafélagið 1986-1990 / 1996
Rafn Ragnar Jónsson - Trommur og söngur 1986-1990 (08-12-54 D.04-07-04)
Haraldur Þorsteinsson - Bassi og söngur 1986-1990 / 1996 (18-07-52)
Jón Ólafsson - Hljómborð og söngur 1986-1990 / 1996 (25-02-63)
Eyjólfur Kristjánsson - Söngur og kassagítar 1986-1990 / 1996 (17-04-61)
Stefán Hjörleifsson - Gítar og söngur 1986-1990 / 1996 (20-12-64)
Jóhann Hjörleifsson - Trommur 1996 (73)


Jón-Stefán-Halli-Eyfi-Rabbi
 
 1. LP Til sölu, 1986 (Hið íslenska bítlavinafélag HÍB)
 2. LP Bítlavinafélagið býr til stemmningu, 1987 (Ísafold)

 
 3. LP 12 íslensk bítlalög, 1988 (Steinar)
 
 
 4. LP Konan sem stelur mogganum, 1989 (Steinar)
 
 
 5. LP Ennþá til sölu, 1996 (Rymur)

Bítlavinafélagið

Í ársbyrjun 1986 hittust 5 hljóðfæraleikarar í sal Verslunarskólans sem þá stóð við Grundarstíg og hófu samstarf sem átti að standa í 1 mánuð en stóð í 4 ár. Nemendamót Verslunarskólans var fyrirhugað í febrúar og kórstjóri var Jón Ólafsson, það þurfti að finna hljóðfæraleikara til að leika undir hjá kórnum. Fyrir valinu urðu Rafn Jónsson trymbill úr Grafík, Haraldur Þorsteinsson bassaleikari sem gert hafði garðinn frægan m.a. með Eik og Brimkló, Eyjólfur Kristjánsson sem hafði starfað með Hálft í hvoru og Stefán Hjörleifsson, félagi Jóns úr Possibillies.

Prógram Verslunarskólans að þessu sinni, saman stóð af tónlist Bítlaáranna. Sama kvöld og nemendamótið fór fram var haldinn dansleikur í Þórskaffi og voru fimmenningarnir fengnir til að leika þar. Bætt var við lögum frá sama tíma. Var gerður góður rómur að frammistöðu hljómsveitarinnar sem enn var nafnlaus. Eitt skólaball til var bókað og enn hjá Versló, nú í Hlégarði. Þá kemur til sögunnar Guðvarður nokkur á Gauk á Stöng. Kemur hann að máli við Eyjólf og spyr hvort hann geti hjálpað sér að setja upp Lennon kvöld á Gauknum. Eyjólfur var þá kominn í mikinn bítlaham með fulltingi Jóns, Stefáns, Haraldar og Rafns og spyr þá félaga hvort þeir séu til í að æfa upp Lennon dagskrá. Það var gert og nú þurfti að auglýsa þetta allt saman upp. Þegar kom að því að skíra hljómsveitina var það hinn orðheppni Haraldur Þorsteinsson sem lagði til nafnið. Bítlavinafélagið skyldi sveitin kallast. Lennon kvöldin slógu í gegn og urðu fjölmörg bæði á Gauknum og síðar Hótel Borg. Ákveðið var að leika víðar fyrst meðbyrinn var til staðar. Hinum ýmsu vertum félagsheimila þótti nú nafnið hálf einkennilegt á hljómsveitinni, langt og lummó. En snemma sumars 1986 kom út 4 laga hljómplata sem hét " Til sölu " og þar á meðal var að finna lagið " Þrisvar í viku " sem skaust beint í 1. sæti vinsældarlistar Rásar 2. þótti þetta hið mesta afrek í þá daga. Hljómsveitin starfaði áfram með hléum þar eð bæði Jón og Stefán fóru utan í tónlistarnám, ekki einu sinni á sama tíma. Sumarið eftir kom út 6 laga hljómplata sem hét Bítlavinafélagið býr til stemmingu. Þar má finna lög eins og Þorvaldur og Hanna Hanna. Á plötuumslagi stendur að Eygló Kristjánsdóttir syngi lagið Þorvaldur. Hið rétta er að með tæknibrellum var tenór rödd Eyjólfs breytt í kraftmikla altrödd konu. Bítlavinir báru ætið mikla virðingu fyrir Bítlahljómsveitum og áttu til að skrýðast í samræmi við það. Alls kyns fíflalæti á dansleikjum og tónleikum ásamt stórskemmtilegri og sérstakri sviðsframkomu urðu til þess að fólk flykktist á böll og tónleika til að berja þessi músíkölsku viðundur augum. Um haustið 1988 kom út hljómplata 12 íslensk Bítlalög. Hún sló í gegn svo um munaði og seldist í nær 10.000 eintökum. Þar heiðruðu Bítlavinir minningu íslenskra Bítlasveita. Það eru mörg skemmtileg lög á þeirri plötu og mörg urðu vinsæl á nýjan leik. Mismikið var átt við útsetningar laganna. Sumar héldu nánast óbreyttar en aðrar eru gjörólíkar, sbr. " Það er svo undarlegt með unga menn ". Á Plötunni má heyra söng allra félaganna í hljómsveitinni. Smáskífan " Munið Nafnskírteinin " kom út snemma sumars 1989 og vakti athygli. Útgáfa tónlistar í þessu formi var gjörsamlega á útleið í tónlistarheiminum en samt fuku 1000 stykki. Annað laganna á þessari plötu heitir Danska lagið og er sennilega vinsælasta lag Bítlavinafélagsins.

Hljómplatan Konan sem stelur Mogganum innihélt frumsamin lög og má segja að hún hafi klikkað, sölulega séð allavega. Greinilegt var að aðdáendur hljómsveitarinnar voru ekki tilbúnir að innbyrða neitt annað en léttmeti frá þeim félögum og hljómplatan skipar ekki stóran sess hjá aðdáendum Bítlavinafélagsins. Í janúarbyrjun 1990 hélt Hljómsveitin sín síðustu böll í Hollywood og Bítlavinir héldu hver í sína áttina. Leiðir þeirra hafa þó skarast í íslenskum tónlistargeira og menn spilað saman við hin ýmsu tækifæri og á hinum ýmsu hljómplötum. En aldrei undir nafni Bítlavinafélagsins.

Bítlavinafélagið kom saman sumarið 1996 og ferðuðust með Bylgjulestinni þar sem Jóhann Hjörleifsson var fengin til að berja húðir í staðinn fyrir Rafn Jónsson en svo ekki sögunni meir.

Tekið af tonlist.is / Seinustu klausuna skrifaði ég sjálfur.

Ef þið hafið upplýsingar, sendið á:
hammond@simnet.is

Uppfært 31-01-09

11.09.2009 17:21

Flytjandi dagsins

Bermuda 2004-
Erna Hrönn Ólafsdóttir - Söngur 2004-2008
Ingvar Alfreðsson - Hljómborð 2004-
Ómar Örn Arnarson - Gítar 2004-
Gunnar Reynir Þorsteinsson - Trommur 2004-
Pétur Kolbeinsson - Bassi 2004-
Íris Hólm Jónsdóttir - Söngur 2008-

   
Pétur-Ómar-Erna-Gunni-Ingvar                     Íris Hólm

 
 1. EP Lag frá mér til þín 2005 (Bermuda)

 
 2. EP If you... 2006 (Bermuda)

 
 3. EP Fegurðargenið er fundið 2006 (Bermuda)

 
 4. EP Dansaðu 2007 (Bermuda)


7. LP Nýr dagur, 31. desember 2007 kl. 23:59 (Bermuda)

 
 5. EP Á Bermuda 2008 (Bermuda)

 
 6. EP I´m not her 2008 (Bermuda)

Erna er söngkona hljómsveitarinnar. Hver kannast ekki við þessa viðkunnanlegu snót að norðan, eftir að hún komst "slatta langt" í Idol-Stjörnuleit veturinn 2003-2004. Leiðir hún bandið með sinni fögru og sterku rödd, og heldur dansgólfinu í leiðslu-gíslingu á meðan hún geislar á sviðinu.
Erna á MySpace síðu.
Mottó: Erna ætlar að gera betur í gær en í dag. [Þess má geta að Erna fann upp tímavélina á dögunum].

Ingvar er hljómborðsleikari hljómsveitarinnar. Hann kemur frá Ísafirði en hefur samt aldrei verið í hljómsveit með Helga Idol-stjörnu. Ingvar er, þótt ungur að árum sé, reynslubolti í tónlistarbransanum og þótti snemma á ferlinum undrabarn; síðar undraunglingur og í seinni tíð undur almennt. Ekki láta útlitið blekkja ykkur, hann er fínn gaur inn við beinið. Ingvar safnar hljómborðum.
Ingvar á MySpace síðu.
Ingvar nemur hljómbyrði í tónlistaskóla FÍH og kennir einnig öðrum um píanóleik -- allt um píanóleik.

Ómar er gítarleikari hljómsveitarinnar. Hann slær gígjuna af svo mikilli sannfæringu að það er ótrúlegt. Ómar er maðurinn sem selur þér sellóstrengi í Tónastöðinni og lætur þig svo svitna á dansgólfinu á Melapöbbnum eftir Sinfó gigg. Ómar á MySpace síðu.
Ómar ætlar í framtíðinni, samhliða gítarleik, að flytja út áður innfluttar vörur. Hann segir að í þeim bransa sé "ógurleg gróðavon". Á þennan hátt er hægt að komast hjá tollum sem enginn veit um!

Gunni er trommari hljómsveitarinnar. Hann hefur verið í mörgum hljómsveitum í gegnum tíðina. S.s.: Reggie On Ice, Sirkús Babalú, Nova, Leynifjelaginu, 737, Sófunum, South River Band, Ríó Tríó og svo mætti lengi telja. Gunni er að staðaldri eftirherma, en stundum hermir hann einnig eftir sjálfum sér. Hann heitir Gunnar Þorsteinsson - en þó ekki í krossinum.
Mottó: "Þessar bévitans trommur og sentimeta - gerið þið þetta - þið eruð menntaðir".
Mottó 2: "Það er ekki hvað það er fast - það er höggið"

Pétur er bassaleikari hljómsveitarinnar. Hver kannast ekki við þennan viðkunnalega fýr að norðan, eftir að hann komst "slatta langt" á Andrésar Andarleikunum veturinn 1963-1964. Leiðir hann hrynsveitina með svæsnu bassabíti og yfirborðskenndum módelhroka, og sveiflar dönsurum á Öldum hrynjandans á meðan hann lætur ljós sitt skína á senunni.
Mottó: Pétur ætlar að setja á markað öryggistilfinningu í samstarfi við fyrirtækið sem hann vinnur hjá; nefnilega Securitas. [Þess má geta að Pétur fann upp dyrabjölluhnappinn á dögunum].

Erna Hrönn Ólafsdóttir sagði skilið við hljómsveitina 2008 og Íris Hólm Jónsdóttir kom í hennar stað en hún var í dúettinum Gís sem hafnaði í 3ja sæti í X-factor veturinn 2006-2007 og er ég ansi hræddur um að sveitungi minn hann Ingvar sé að slá sér upp með Írisi.

Tekið af heimasíðu hljómsveitarinnar. / Seinustu klausuna skrifaði ég sjálfur.

Ef þið hafið upplýsingar, sendið á:
hammond@simnet.is

Uppfært 29-08-09

10.09.2009 20:13

Flytjandi dagsins

Baraflokkurinn 1980-áramóta 1984/1985 / 2000
Ásgeir Jónsson - Söngur 1980-áramóta 1984/1985 / 2000
Þór Freysson - Gítar 1980-áramóta 1984/1985 / 2000
Baldvin H. Sigurðarson - Bassi 1980-áramóta 1984/1985 / 2000
Jón Arnar Freysson - Hljómborð 1980-áramóta 1984/1985 / 2000
Árni Henriksson - Trommur 1980-1982
Sigfús Örn Óttarsson - Trommur 1982-áramóta 1984/1985 / 2000

 
  Jón - Ásgeir - Árni - Baldvin - Þór

 1. EP Baraflokkurinn, 1981 (Steinar)
 2. LP Lizt, 1982 (Steinar)
 3. LP Gas, 1983 (Steinar)
 
  
 4. LP Zahír, 2000 (Skífan)

Baraflokkurinn

Baraflokkurinn er sennilega ein þekktasta sveit Akureyringa frá níunda áratugnum, stofnuð seinni hluta árs 1980. Að sögn þeirra félaga var hún stofnuð af tómum leiðindum.

Baraflokkinn skipuðu söngvarinn Ásgeir Jónsson, bassaleikarinn Baldvin H. Baldvinsson, bræðurnir Þór Freysson, gítar, og Jón Arnar Freysson, hljómborð, en  hann hafði talsvert leikið með skólahljómsveitum þegar hann hóf að æfa og spila með Baraflokknum, og loks trommarinn Árni Henriksson. Sveitin þótti meira tónleikaband en ballhljómsveit og var tónlist þeirra félaga gjarnan líkt við tónlist Davids Bowie. Þeir áttu því kannski ekki í mörg hús að venda norðan heiða.

Að áeggjan Bubba Morthens, þegar bandinu var boðið að hita upp á tónleikum Utangarðsmanna, sendu þeir demó af efni sínu til útgáfufyrirtækisins Steinars. Útgáfan munstraði sveitina á samning og kom fyrsta plata þeirra félaga út sumarið 1981. Þar var á ferð sex laga tólftommu plata sem vakti á þeim athygli enda var henni fylgt fast eftir með tónleikahaldi um land allt. Inn á milli spilamennskunnar var æft af kappi.

Í miðjum klíðum urðu trommaraskipti og í stað Árna settist við settið 14 ára gamall Sigfús Óttarsson, sem starfað hafði með líttþekktu unglingarokkbandi sem nefndi sig ½ 7. Með þessa liðskipan hljóðritaði Baraflokkurinn sína fyrstu LP plötu, Lizt, fyrir páskana 1982 og kom hún út þá um sumarið. Þar vakti lagið I don´t like your style almenna athygli á sveitinni og er eitt þeirra laga sem haldið hefur nafni hennar á lofti. Á þessari plötu er líka að finna lagið Motion, sem er einnig á plötunni Rokk í Reykjavík, en þar hafði lagið verið gefið út sem Moving up to a motion.

Næsta plata sveitarinnar var unnin í nágrenni London á vormánuðum 1983 og fékk heitið Gas. Platan er af mörgum talin besta plata flokksins, heilsteypt og rökrétt framhald af því sem þeir höfðu verið að gera. Þessi plata reyndist þó svanasöngur hljómsveitarinnar, ef frá er talin endurkoma þeirra þegar ráðist var í gerð safnplötunnar Zahír, sem hefur að geyma helstu lög Baraflokksins og gefin var út árið 2000. Reyndar segir sagan að þeim félögum hafi árið 1991 verið boðin álitleg fjárhæð fyrir að koma saman en hafnað því enda komnir hver í sína áttina.

Bárður Örn Bárðarson

Ef þið hafið upplýsingar, sendið á:
hammond@simnet.is

Uppfært 31-01-09

09.09.2009 17:12

Flytjandi dagsins

Á Móti Sól 1995-
Heimir Eyvindarson - Hljómborð 1995-
Þórir Gunnarsson - Bassi 1995-
Björgvin J. Hreiðarsson - Söngur 1995-1999
Sæmundur Sigurðsson - Gítar 1995-1998
Ingólfur Arnar Þorvaldsson - Trommur 1995-1997
Jóhanna Ýr Jóhannsdóttir - Söngur 1996-1997
Stefán Ingimar Þórhallsson - Trommur 1997-
Sævar Þór Helgason - Gítar 1998-
Guðmundur Magni Ásgeirsson - Söngur, gítar 1999- (01-12-78)


Þórir-Magni-Heimir-Stebbi-Sævar

 
  1. LP Gumpurinn, 1997 (Á Móti Sól)

  2. LP 1999, 1999 (Á Móti Sól)

 
  3. LP áms, 2001 (Skífan)

 
  4. LP Fiðrildi, 2003 (Skífan)

 
  5. EP Allt, 2003 (Skífan)

 
  6. LP 12 íslensk topplög, 2004 (Samyrkjubúið)


  7. LP Hin 12 topplögin, 2005 (Samyrkjubúið)

 
  8. EP Þrisvar í viku, 2005 (Samyrkjubúið)

 
  9. EP Hver einasti dagur, 2006 (Samyrkjubúið)

 
10. EP Hvar sem ég fer, 2006 (Samyrkjubúið)

 
11. LP Á Móti Sól í 10 ár,nóvember  2006 (Samyrkjubúið)

 
12. EP Til þín 2008 (Samyrkjubúið)

 
13. EP Árin 2008 (Samyrkjubúið)

 
14. EP Sé þig seinna 2008 (Samyrkjubúið)

 
15. EP Ef þú ert ein 2009 (Samyrkjubúið)

 
16. EP Dagarnir 2009 (Samyrkjubúið)

17. Ný plata væntanleg 2009

Saga hljómsveitarinnar Á móti sól

Hljómsveitina Á móti sól skipa þeir Guðmundur Magni Ásgeirsson - söngvari, Sævar Helgason - gítarleikari, Heimir Eyvindarson - hljómborðsleikari, Þórir Gunnarsson - bassaleikari og Stefán Ingimar Þórhallsson - trommari. Hljómsveitin var stofnuð haustið 1995 og Þórir og Heimir eru þeir einu sem eftir eru af upprunalegum meðlimum. Stefán gekk til liðs við hljómsveitina vorið 1997, Sævar vorið 1998 og púsluspilið var loks fullgert þegar Magni bættist í hópinn haustið 1999. 

Hljómsveitin hefur átt miklum vinsældum að fagna á íslenskum ballmarkaði og m.a verið í "lykilhlutverki" á vinsælustu útihátiðum landsins, t.a.m. 6 sinnum á Þjóðhátíð í Vestmannaeyjum. Lög ÁMS hafa mörg náð miklum vinsældum s.s  Djöfull er ég flottur, Á þig, Stelpur, Sæt, Vertu hjá mér, Þegar jólin koma, Spenntur, Afmæli, Austur-Þýzk, Ég er til, Eitthvað er í loftinu, Keyrðu mig heim, Drottningar, Allt, Einveran og núna síðast LANGT FRAM Á NÓTT.

Hljómsveitin hefur gefið út 6 plötur, þar af 4 með Magna innanborðs. Sú fyrsta bar hið undarlega nafn GUMPURINN og kom út 1997. Fyrsti "singull" þeirrar plötu var endurgerð á laginu Reykjavíkurborg sem Þú og Ég höfðu gert ódauðlegt mörgum árum áður. Þessi útgáfa fékk svolitla spilun í útvarpi á vormánuðum 1997, en um sumarið kom fyrsti alvöru smellurinn, Djöfull er ég flottur. Þar með fór boltinn að rúlla. Árið 1999 kom önnur plata sveitarinnar, en hún heitir einmitt 1999. Skemmtilegt;-) Í millitíðinni höfðu komið lög á safnplötum, m.a. Á Þig sem var á SVONA ER SUMARIÐ 1998. Á Þig var gríðarlega vinsælt sumarið 1998 og náði svo flugi aftur í órafmagnaðri útgáfu haustið 1999, en þá var Magni nýkominn í bandið, og lagið náði síðan þriðja "vinsældaskeiðinu" vorið 2002 þegar fyrsti ELDHÚSPARTÝ diskurinn kom út. Sannarlega góð nýting á einu litlu lagi. En semsagt breiðskífan 1999 fékk mjög góðar viðtökur hjá gagnrýnendum, en seldist nú ekki í neinum bílförmum, nokkur lög af plötunni náðu þó talsverðri útvarpsspilun, s.s. Sæt og Viagra. Þrátt fyrir að sala plötunnar gengi ekki sem skyldi gekk hljómsveitinni vel á ballmarkaðnum, sem fyrr. Um sumarið tilkynnti þáverandi söngvari, Björgvin Hreiðarsson, að hann ætlaði að hætta um haustið. Þá þefuðu strákarnir Magna uppi austur á Egilsstöðum, þar sem hann starfaði við brauðagerð og kökubakstur, splæstu á hann flugfari í bæinn þar sem var tekin smá prufa og má segja að sveitastrákurinn hafi verið ráðinn á staðnum, enda stóð hann sig prýðilega;-) Söngvaraskiptin urðu í September 1999 og Magni smellpassaði svo inní bandið að það þurfti ekki að gera neitt einasta hlé á spilamennsku! Síðasta ball Björgvins var skólaball á Astró á miðvikudegi og fyrsta ball Magna var réttaball á Hellu laugardaginn þar á eftir! 

Fyrsta lagið sem Magni tók upp í hljóðveri með bandinu var jólalagið, Þegar jólin koma, sem varð mjög vinsælt fyrir jólin 1999. Árið 2000 var hljómsveitin ekki með í plötuútgáfu en lagið Vertu hjá mér var á SVONA ER SUMARIÐ. Vorið 2001 frumflutti hljómsveitin lagið - Spenntur á Hlustendaverðlaunum FM 957 í Borgarleikhúsinu. Spenntur varð gríðarlega vinsælt, smellti sér á topp íslenska listans t.a.m. og í kjölfarið var undirritaður plötusamningur við Skífuna. Í September sama ár kom út 3. breiðskífa hljómsveitarinnar, og sú fyrsta með Magna innanborðs. Hún heitir ÁMS og fékk frábæra dóma hjá nær öllum gagnrýnendum nema gítarleikaranum í Fákum frá Grindavík, sem gagnrýndi plötuna fyrir blað sem nú er farið á hausinn. 

Sumarið 2001 var hljómsveitin í Bylgjulestinni og sjaldan hafði verið jafn mikið að gera í spilamennsku. Árið 2002 kom engin plata frá drengjunum en lagið Keyrðu mig heim var á SVONA ER SUMARIÐ, auk þess sem hljómsveitin átti 2 lög á Eldhúspartý - diskinum , sem áður er minnst á. 

Árið 2003 leit svo 4. breiðskífa hljómsveitarinnar dagsins ljós. Sú ber nafnið FIÐRILDI og gekk mjög vel í landann - enda  inniheldur hún nokkra af vinsælustu lögum hljómsveitarinnar hingað til - Drottningar, Allt og Einveran til að nefna nokkur. 

Áms byrjaði 2004 með því að gefa út eitt lag - Langt fram á nótt - en síðan var stefnunni breytt aðeins þegar upp kom sú hugmynd að gefa út svonefnda ábreiðu-plötu með uppáhalds-íslensku lögum sveitarinnar. Afrakstur þess starfs er fyrsta gullplata bandsins - 12 íslensk topplög sem kom út fyrir jólin 2004 og seldist í bílförmum. Seinni hluti þessa verkefnis - Hin 12 topplögin - kom síðan nokkrum mánuðum síðar og vakti ekki minni lukku...

Hljómsveitin hefur átt miklum vinsældum að fagna á íslenskum ballmarkaði og m.a verið í "lykilhlutverki" á vinsælustu útihátíðum landsins, t.a.m. hefur hljómsveitin alls níu sinnum verið eitt af aðalnúmerunum á Þjóðhátíð í Vestmannaeyjum. Lög ÁMS hafa mörg náð miklum vinsældum og nægir þar að nefna lög eins og Hvar sem ég fer, Spenntur, Árin, Ég er til, Vertu hjá mér, Keyrðu mig heim, Á þig, Djöfull er ég flottur, Allt, Langt fram á nótt, Sæt og jólalagið sívinsæla; Þegar jólin koma.

Hljómsveitin hefur gefið út 7 plötur og hafa fjórar þeirra náð gullsölu, sem verður að teljast viðunandi árangur svo ekki sé meira sagt! Áttunda plata sveitarinnar mun síðan líta dagsins ljós árið 2009.


Tekið af heimasíðu hljómsveitarinnar og tonlist.is

Ef þið hafið upplýsingar, sendið á:
hammond@simnet.is

Uppfært 29-08-09

06.09.2009 20:12

Trommarar

Á þessari síðu getið þið séð allmarga íslenska trommara og er þetta snilldar síða.

http://www.trommari.is/

01.09.2009 22:28

TÓNLIST

Rosa mikið að gerast hér er að skrá inn hægri vinstri upplýsingar um einherja / hljómsveitir og flytjendur sem uppi hafa verið á Íslandi og einnig að reyna að skrá allar upplýsingar um mína tónlist sem ég á. Þetta tekur sinn tíma.
  • 1